Zakopane

Eng Geschicht aus dem Krich

_
Synopsis

Zakopane spillt an de Joren 1939-1941. Zwee Schicksaler treffen openaner. Dat vum Alois, e frustréierte Flantes aus biergerlecher Famill, deen an der Nazi-Ideologie eng Recht­fäerdegung fënnt, fir sengem Haass op d‘Judde fräie Laf ze loossen an dat vum Ackermann, en eelere Gendaarm, deen enquêtéiert. Am Laf vun de Méint, an der erdréckender Atmosphär vun der „drôle de guerre“, kënnt hien dem Mäerder ëmmer méi no, bis dee, just virun der Invasioun 1940, verschwënnt. Duerno muss den Ackermann d’Nazifizéierung vun der Polizei iwwert sech ergoe loossen, wärend den Alois beim grousse Morden am Osten derbäi ass. 1941 mécht dem Ackermann säi Gewëssen net méi mat. Hie quittéiert den Déngscht, mä sicht weider nom Alois; d‘Spur féiert a Polen.

_
Extrait

Mat Momenter bréngt de Wand aus dem Norden och en anert, onbekannt Geräisch eriwwer; wéi wann een eng Kette géif iwwert d’Strooss schleefen: de Kaméidi vu Panzeren, déi laanscht d’Stad fueren, fir esou séier wéi méiglech op d’belsch Grenz ze kommen. Wéi et ufänkt, hell ze ginn, an den Himmel sech gro fierft, gesi se eng Partie Fligeren, déi iwwert d’Stad no Süde fléien. Mä soss schléift d’Stad weider, wéi eng Insel an engem Mier, dat vu gewaltegen a schreck­leche Wellen opgewullt gëtt. Bis ee jäizt: Do si se!