Neit Kannerbuch fir erwuesse Leit: Monster Malya vum Roland Meyer

Den 23. Abrëll 2023 um “Fest vum Buch” zu Beetebuerg am Schlass hu mir dem Roland Meyer säin neit Buch “Monster Malya” virgestallt.

Elo ass et bei eis am Webshop a geschwënn och an de Librairien.

Et handelt sech, wéi och scho beim “Tel Mo”, em ee Kannerbuch fir erwuesse Leit.

Firwat bass de heihinner komm, Malya?

Goldie, neen, ech hu keng Loscht, Mann! Net elo.

An ech hu keng Loscht, nach eng Kéier sechs Méint ze waarden. Malya, Goldfësch si virwëtzeg a liewen net esou laang wéi Mënschen.

Neen, am Eescht, ech hunn elo kee Bock, engem Goldfësch ze verklickeren, wat déi lescht zwee Deeg lass war. Vergiess et! Dat ass ze komplizéiert fir dech!

Dann eeben net. Ciao Malya!

A fort ass en. Verschwonnen, ënnert engem Steen. Ech doe meng Flip Flops aus a klammen an dat äiskaalt Waasser vum Ale Buer. Ale Buer, esou heescht déi schäisskal Quell wierklech, an déi ech de Goldie virun zwee Joer ausgesat hat. Ale Buer. Mann, voll lescht Joerdausend! Hanne bei enger Fielswand kënnt d’Waasser erausgelaf, eng Quell eeben, et spruddelt, blubb blubb blubb. Do virdrun ass ee grousst Becken, mat Sand um Buedem a Steng an esou, an do dra wunnt de Goldie elo.