Renée Weber: Eng Maus am Haus

Beschreibung

Sprooch: Lëtzebuergesch
Kannerbuch

Lëtzebuerger Buchpräis 2016 (Kanner- a Jugendbuch)

faarweg illustréiert vun de Kanner aus der Heischter Kannerstuff

Op der Lay 554
2015, 44 Säiten

ISBN 978-2-87967-212-0

«Net all Maison Relais huet d’Chance, eng Geschichtenerzielerin bei sech schaffen ze hunn», schreiwt Ghislaine Feinen am Virwuert an erkläert, wéi et zu deem Kannerbuch hei kommen ass. D’Renée Weber, wat mat senge Bicher D’Ann Spann an de Rolfi Raup (4. Oplo), Alles wéinst dem Willi Wull (3. Oplo), Muhna Lisa (2. Oplo), Dem klenge Felix seng grouss Rees (2. Oplo), Wou ass de Sam?, Bommel an De Bopi Néckel fiert an d’Vakanz eng immens grouss Erfarung bei den Texter wéi och bei den Illustratioune sammele konnt, huet sech eng Geschicht ausgeduecht an d’Kanner aus der Heischter Kannerstuff hu fir déi Geschicht Biller gemoolt.

Et ass eng spannend, mä och lëschteg Geschicht, wou d’Kanner op eemol mierken, datt nuets, wa si net do sinn, eng Mausmamm mat hir Kanner op der Sich ass, fir eppes ze frupsen ze fannen. An och dem Noper seng Kaz Luigi ass keng grouss Hëllef. Mä kuckt Iech mol selwer un, wéi flott déi Zesummenaarbecht tëschent der Kannerbuchautorin an de klengen Illustrateure verlaf ass.

2009 krut d’Renée Weber fir säi Buch Dem Klenge Felix seng grouss Rees de Lëtzebuerger Buchpräis bei de Kannerbicher an 2016 krut et dee Präis an der Kategori Kanner- a Jugendbuch nach eemol fir Eng Maus am Haus.